Jólablóm

Jólastjarna (Euphorbia pulcherrima)

Jólastjarnan vex villt í Mexíkó og getur í sínu upprunalega umhverfi orðið allt að 5 metra hár runni. Jólastjarnan sem við þekkjum sem stofublóm hjá okkur hefur orðið til með kynbótum og er gífurlega vinsælt jólablóm hér á landi.

Eiginleg blóm Jólastjörnunar eru frekar óspennandi, lítil og gul, en háblöð hennar eru hins vegar ástæða vinsældanna, en þau verða rauð eða hvít og allt þar á milli, en háblöðin geta haldið litnum mánuðum saman ef lífsskilyrði hennar eru góð.

Þegar þú kaupir Jólastjörnu á hún að vera frískleg og stinn og ekki farin að missa blöðin. Hún er mjög viðkvæm fyrir kulda og trekki og því nauðsyn að gæta vel að sér þegar hún er flutt heim eða annað. Jólastjörnu má ekki heldur verða of heitt og henni líður best í talsverðri birtu, hana er best að vökva með volgu vatni og gefa henni reglulega áburð.

Hvíldartími tekur við hjá Jólastjörnunni eftir blómgun, en þá er gott að velja henni kaldari stað en samt í mikilli birtu og nú er ráð að minka vökvunina en án þess að hún þorni. Að vori má klippa eða snyrta stjörnuna auk þess að umpotta (ekki nota súra mold) en þá lýkur hvíldartímanum.

Verið gætin í meðhöndlum Jólastjarna því þær eru eitraðar og ef safi vætlar úr henni t.d. ef grein brotnar þarf að gæta þess að safin berist ekki í augu eða sár. Geymið Jólastjörnu ávalt þar sem börn ná ekki til.

Hýasinta

Ef þú ert ekki ein(n) af þeim sem ræktar Hýasintuna sjálf(ur) frá upphafi, er best að kaupa hana rétt fyrir blómgun. En ef þú þarft að tefja fyrir blómgun er rétt að hafa hana á svölum stað og vökva sparlega.

Þegar blómið er að byrja að sprynga út þarf hún meiri hita og vökvun auk þess sem rétt er að gefa smá áburð. Hýasintur þurfa reglulega vökvun og stöðugt hitastig, en einnig þarf að gæta þess að vökva í moldina eða á diskinn ekki yfir blóm eða blöð.

Jólasíða Systu 30 október 2001